1) Эмкал;

2) Бежана;

3) Уьстаг1;

4) Газа.

Г1урбана юьйш йолу эмкал пхи шо кхаьчна, бежана, газа – ши шо кхаьчна, уьстаг1 – цхьа шо кхаьчна хила безаш бу. Эмкал, бежана ворх1анна т1ера ден мегар ду. Нагахь уьстаг1 шо кхаьчна бацахь, амма хьалхара цергаш охьаэгна белахь, иза г1урбана урс хьакха мегаш бу. Абу Х1урайрата (Дела реза хуьлда цунна) элира, шена Делан Элчано (Делера салам-маршалла хуьлда цунна) олуш хезира, аьлла: «Г1урбана урс хьокхуш болчу уьстаг1ах диканиг – иза шен хьалхара церг охьайожнарг бу». Ахьмада дийцина хьадис.                                                                                   

  Г1урбана урс хьокхуш долу хьайба жижигана эшам беш долчу сакхтах маьрша хила деза. Б1аьрг баьлларг, астаг1аниг, гирз даьлларг, т1ех г1ийла берг, лерг доцург мегар бац г1урбана. Амма лергана 1уьрг даьккхина, я к1еззиг лерг хадийна хилча, г1урбана мегаш бу и. 1азибан к1анта Барраа (Дела реза хуьлда цунна) дийцина, Пайхамара (Делера салам-маршалла хуьлда цунна) элира, аьлла: «Диъ х1уманах цхьаъ шеца долу хьайба г1урбана мегар дац: б1аьрг баьлларг я б1аьрзе берг, шен б1аьрзе хилар билгала долуш; цомгаш берг, шен цомгаш хилар билгала долуш; цхьа ког боцург я астаг1а берг, шен астаг1а хилар билгала долуш; г1ийла-оза берг, шен т1ум йоцуш».  Тирмизис дийцина хьадис.

  Х1ара сакхташ санна лоруш ду церан жижиг эшош долу кхидолу сакхташ а. Урс хьокхуш волчунна нигат дар важиб ду, ша урс хьакхар деза а ду цунна. Нагахь ша и хууш вацахь, цо векал ван мегар ду урс хьакха хууш верг.

1) Бусалба хилар. Керста волчунна т1ехь дац г1урба дер.

2) Пхийттара ваьлла волуш, хьекъал долуш хилар. Берана, хьекъална эшна волчунна а т1ехь дац г1урба дер.

3) Г1урба ден аьтто хилар. Г1урбана урс хьокхучу дийнахь, цул т1аьхьа дог1учу кхаа дийнахь шена а, шен доьзална а луш долчу напханал алсам рицкъа долуш иза велахь, г1урба дер т1ехь ду цунна.   

Г1урба – ч1аг1дина суннат ду, аьтто болчо кхочуш ца деш дита мегар доцуш. Доьзалехь цхьамма г1урба дийча, массарна а кхачам бо цо, цуьнан ял а хуьлу массарна. Ибн 1аббаса (Дела реза хуьлда цунна) дийцина, Элчано (Делера салам-маршалла хуьлда цунна) элира, аьлла: «Адаман т1аьхьенах цхьаммо а х1окху (г1урбанан) дийнахь г1урбана урс хьаькхна ц1ий 1анорал еза 1амал ца йина, гергарло хоттаран 1амал йоцург». Т1абранис дийцина хьадис.

Турпал-1елин к1анта Хьасана (Дела реза хуьлда цунна) дийцина, Элчано (Делера салам-маршалла хуьлда цунна) элира, аьлла: «Ц1енчу нигатца, Делера ял хиларе сатуьйсуш г1урба дийначунна, цуо дийна г1урба жоьжахатих и ларвеш йолу дуьхьало хилла д1ах1уттур ду». Т1абранис

дийцина хьадис.

Г1урба дер важиб хилла т1едужу шина бахьанца: 1) Стага шен долахь долчу, г1урбана урс хьакха мегар долчу бежанна, я уьстаг1на, я газанна т1е п1елг хьажийна, и билгалдаьккхича, х1ара сан г1урба ду, я х1окху бежанца (уьстаг1ца, газанца) г1урба дуьйр ду ас, аьлла; 2) Стага ч1аг1о йина шена т1елаьцнехь, Далла гергахуьлуш г1урба дуьйр ма ду ша, оцу дийне ша валахь, аьлла. Иштта важиб хилла долчу г1урбана урс хьаькхча, цунах долу  жижиг дерриге саг1ина дала деза, и шена т1ера дийначунна даа ца мега.